Martohen në moshën 80-vjeçare, pas 17-viteve fejesë

SHBA, 18 Nëntor 2011 NOA/ R.Bulku - Dashuria nuk njeh limite moshe. Eshtë kjo të paktën ajo çka përcillet nga historia e një çifti amerikan në Maine.

Pas 17 vitesh fejesë, faktikisht, Paul Walker dhe Ann Thayer, respektivisht nga 88 dhe 87 vjeç, janë martuar në një qendër rehabilitimi për të moshuar të Lewiston, në Maine.

Ata kanë pranuar njëri tjetrin përpara altarit dhe përpara një grupi të vogël familjarësh dhe miqsh, raporton agjencia e lajmeve NOA.al.

Ann, e cila tashmë është bërë zonja Walker, shkon të takojë çdo ditë bashkëshortin e saj dhe ka pohuar se së bashku kanë kaluar ditë të mrekullueshme.

Të sapomartuarit janë takuar në kishë dhe duhet thënë se të dy kanë pasur dhe martesa të mëparshme.

Ata duan që të mos i mungojë asgjë si çift dhe sapo Paul të ndihet më mirë, që të dy do të nisen për muajin e mjaltit që e kanë programuar në Bermuda.

r.b/NOA