Për shkak të Jahjagës, Nikoliq ndoshta s’shkon në Sllovaki

Shefi i diplomacisë sllovake Mirosllav Lajçak do të qëndrojë sot për vizitë zyrtare në Beograd, në kuadër të të cilës presidenti Tomisllav Nikoliq dhe zyrtarët e qeverisë do ta informojnë se a do të marrë pjesë Serbia në samitin rajonal në Sllovaki, më 12 dhe 13 qershor, në të cilin është ftuar edhe Kosova, shkruan e përditshmja “Danas”.

Në kabinetin e Nikoliqit kanë pohuar për gazetën se ende nuk është vendosur nëse në samitin e shefave të shteteve apo të qeverive të vendeve të Evropës Qendrore, Lindore dhe Juglindore do të marrë pjesë edhe presidenti i Serbisë, duke pasur parasysh se ftesë ka marrë edhe presidentja e Kosovës Atifete Jahjaga.

Siç njoftohet temë kryesore e bisedimeve të sotme të ministrit sllovak Mirosllav Lajçak me zyrtarët serbë do të jenë rezultatet e dialogut të Beogradit dhe Prishtinës, situata në Ballkanin Perëndimor, procesi i zgjerimit të BE-së dhe marrëdhëniet e dy vendeve.