Shqipëria ngjit 23 vende, kuqezinjtë të 50-tët në listën e FIFA

Kombëtarja e Shqipërisë ndodhet në pozitën 50 të listës së re të FIFA-s, plot 23 vende më lart se sa muajin e kaluar.
Shqipëria pas fitores në kuadër të eliminatoreve për evropianin 2012 kundër Bjellorusisë, ka shënuar ngritje për 23 vende në listën e publikuar të mërkurën nga Federata Ndërkombëtare të Futbollit (FIFA).
Kuqezinjtë kanë 564 pikë, duke kaluar Hungarinë dhe Bjellorusinë, të cilat kanë shënuar rënie me 16 vende në listë.
Në vendin e parë vazhdon të qëndrojë kampioni botëror dhe evropian Spanja me 1857 pikë, pasuar nga Holanda me 1702, Brazili 1425, Gjermania 1386, Argjentina 1276, Anglia 1163, Uruguai 1094, Portugalia 1052, Italia 1019, Kroacia 991 pikë etj.