“Apple”, Cook Në “Fabrikën E Skllevërve”

Tim Cook, administratori i deleguar i kolosit të elektronikës “Apple”, ka vizituar në provincën Zhengzhou të Kinës fabrikën e “Foxconn”, ndërmarrja taivaneze që prodhon dhe monton iPhone-t dhe iPad-et për vendin më të madh aziatik. Në fabrikën në fjalë punojnë mbi 120 mijë persona dhe ajo ka një linjë për prodhimin e iPhone-ve. “Foxconn”, që ka shumë fabrika në Kinë, është akuzuar shpesh se detyron punëtorët të punojnë në kushte shumë të vështira.Zërat janë shtuar sidomos pas një vale vetëvrasjesh nga radhët e punëtorëve të saj. Pak kohë më parë në këtë fabrikë nisën verifikimet, pikërisht pas publikimit në media të lajmeve mbi kushtet e vështira të punës dhe trajtimin e punonjësve si skllevër.

Ndërkohë, në ditët e fundit vetë “Apple” është detyruar të rimbursojë të gjithë klientët e saj në Australi, si pasojë e një keqinformimin për aftësitë 4G të iPad-it të ri.

Gjithçka lindi kur Organizata për Mbrojtjen e Konsumatorit në Australi paditi “Apple” për reklamim të rremë, pasi tableti i ri nuk funksionon me rrjetin 4G të vendit.