Krijohet databaza online për iso-polifoninë

Tiranë, 20 mars 2012, NOA – Për herë të parë, iso-polifonia shqiptare, kjo vlerë e patjetërsueshme e trashëgimisë shpirtërore e kulturore të vendit e mbrojtur si një kryevepër e njerëzimit edhe nga UNESCO, do të jetë tashmë në një databazë online, raporton agjencia e lajmeve NOA.al.

Krijimin e kësaj databaze e bëri me dije ministri i Kulturës Aldo Bumçi, i cili e cilësoi nismën si një pjesë tejet të rëndësishme për ruajtjen e trashëgimisë shpirtërore.

Ministri Kulturës theksoi se katalogimi dhe ruajtja e vlerave të trashëgimisë shpirtërore ka një rëndësi të madhe për tejçuarjen e këtyre vlerave në shekuj edhe për brezat e ardhshëm.

“Është detyrë e jona që pasurinë e trashëguar ndër shekuj ta konservojmë dhe dixhitalizojmë në mënyrë që këtë pasuri shpirtërore të popullit ta përçojmë në të ardhmen me metoda bashkëkohore”, tha Bumçi.

Ai nënvizoi se Shqipëria është e pasur me vlera të trashëgimisë kulturore, andaj shtoi ai, “ky është vetëm fillimi i punës për vlerësimin e kësaj trashëgime përmes formave të regjistrimit dhe katalogimit”.

I pranishëm në këtë konferencë për median në mjediset e MTKRS-së, akademiku Vaso Tole tha se “përmes këtij sistemi të dhënash do të rriten kapacitetet për ruajtjen dhe transmetimin e iso-polifonisë duke u ardhur në ndihmë institucioneve të ndryshme, specialistëve të fushës, publikut të interesuar etj”.

Tole theksoi se “futja e iso-polifonisë në kurrikulat shkollore për edukimin e të rinjve me vlerat e trashëgimisë kulturore shpirtërore dhe të diversitetit kulturor ishte një hap shumë i rëndësishëm”.

Ai nënvizoi se “databaza e iso-polifonisë do të mbetet gjithmonë një faqe e hapur për pasurim të mëtejshëm”.

Iso-polifonia është pranuar si pjesë e listës së trashëgimisë botërore dhe njerëzimit në UNESCO, më 25 nëntor të vitit 2005 dhe pjesë e listës kombëtare të "Kryeveprave të trashëgimisë kulturore shpirtërore", më 29 shtator 2010.

mit/noa.al