68-vjetori i çlirimit të Tiranës

Me rastin e 68-vjetorit të clirimit të kryeqytetit, Kryetari i bashkisë së Tiranës Lulzim Basha ka kryer mëngjesin e së shtunës homazhe në varrezat e dëshmorëve.

Në fjalën e tij, pas ceremonisë kryebashkiaku ka bërë thirrje për bashkim me qëllim që t’i japim vendit atë që meriton.

Duke e vlerësuar kontributin e dëshmorëve që dhanë jetën për lirinë e vendit, Basha tha se nderimi i atyre burrave dhe grave është një detyrim ndaj tyre, por dhe një shembull i mirë për edukimin e brezave të ardhshëm, për t'u treguar se ata që vdesin për Atdheun nuk vdesin kurrë.

“Ky përkujtim nis me një përlulje të thellë, nderojmë ata që ranë dhe luftuan për clirimin e Tiranës, e kësaj faqe të lavdishme që i dhanë kryeqytetit clirimin e pritur. Një detyrim edhe për edukimin e brezit të ardhshëm. Ata që bien për atdheun nuk vdesin kurrë. Shpresoj që në këtë 100 vjetor, të shërbejë si një burim për bashkim dhe jo përçarje. Detyra jonë është të mos përsërisim gabimet e të shkuarës, por të bashkohemi të gjithë për t'i dhënë vendit atë që meriton”, tha Basha.

Lufta për çlirimin e Tiranës është vlerësuar si operacioni më i madh i shkallës operativo-strategjike i zhvilluar nga Ushtria Nacional Çlirimtare për çlirimin e qyteteve dhe shembulli më tipik për pjesëmarrjen e drejtpërdrejtë të popullit në betejën për çlirim.