CEZ nuk garonton energji për festat e fundvitit: “Nuk kemi fonde”

Duket se CEZ Shpërndarje nuk “ka vënë mend” edhe pas presionit nga ana e Ministrisë së Ekonomisë dhe Energjetikës e cila theksoi se nuk do të tolerojë kufizime të energjisë elektrike gjatë festave, Kështu kompania ceke ka reaguar duke thënë se gjendja financiare nuk i mundëson akses për të ofruar shërbim cilësor, përfshi edhe furnizimin normal me drita.

“Angazhimi kryesor i kompanisë mbetet furnizimi me energji elektrike i klientëve të rregullt dhe kompania po bën të gjitha përpjekjet e mundshme për t’iu përmbajtur këtij angazhimi, por bllokimi i vazhdueshëm i llogarive bankare të kompanisë nga institucionet shtetërore ERE, KESH dhe OST, e ka bërë pothuajse të pamundur kryerjen e çdo shpenzimi operativ për mirëmbajtjen e rrjetit dhe riparimin e defekteve”, thekson CEZ-i.

Bllokimi i llogarive bankare është marrë me vendim gjykate pasi CEZ u ka borxh institucioneve të tjera përkatësisht: KESH-it, 150 milion euro, OST-së, 35 milion euro, ERE-s, 3 milion euro. Kjo do të thotë se kufizimet me energji do të vazhdojnë edhe gjatë festave duke bërë që konsumatori të jetë ai që do ta vuajë këtë gjë./alb-observer.com/