Russell Crowe mohon lidhjen me 22-vjeçaren

Aktori Russell Crowe ka mohuar përmes një mesazhi në rrjetin social Twitter zërat për një lidhje romantike me aktoren Samantha Barks, 26 vjet më e re se ai.

“Mesa duket jemi bërë artikuj për revistat. Më fal për këtë, Sammi”, shkruan në faqen e tij Crowe. Por nuk është e vështirë të shohësh përse zërat për një lidhje të mundshme filluan të qarkullonin.

Crowe, aktualisht 49 vjeç, dhe Barks, protagoniste në filmin “Les Miserables”, ishin parë teksa hanin mëngjes së bashku pas natës së çmimeve Oscar. Ata gjithashtu i kanë dërguar mesazhe të shpeshta njëri-tjetrit në Twitter dhe në një intervistë të botuar në janar, Barks thoshte se ajo ishte pjesë e grupit muzikor të aktorit. Crowe është bërë objekt i spekulimeve të shumta që prej tetorit të kaluar, kur u raportua se martesa e tij 9-vjeçare me Danielle Spencer kishte marrë fund.

Në dy muajt e fundit, ylli i filmit “Gladiatori” është lidhur me aktoret Dita Von Teese dhe këngëtaren bashkëkombase Natalie Imburglia, 38 vjeçe.