Çfarë duhet të dimë rreth antibiotikëve?

Edhe pse nuk ka statistika, fitohet përshtypja se te ne ka një përdorim të madh, të pakontrolluar të antibiotikëve. Derisa në vendet “normale” antibiotikët shiten vetëm me recetë, te ne farmacisti e luan edhe rolin e mjekut dhe jua cakton se cilin antibiotik duhet ta merrni ju, apo edhe anëtari i familjes, të cilin farmacisti as që ka rast ta shohë.
Duhet ta dimë se antibiotikët janë efikasë vetëm në mjekimin e infeksioneve me baktere, kurrsesi edhe me viruse. Kjo dmth se, nëse merrni antibiotikë kur ftoheni (infeksion me viruse), atëherë vetëm e dëmtoni organizmin dhe xhepin tuaj.
Nëse përdorni antibiotikë vend e pa vend, atëherë ekziston rreziku i paraqitjes së infeksioneve me kërpudha, apo edhe me baktere, të cilat janë rezistente ndaj antibiotikëve.
Për këtë shkak, ajo që duhet ditur rreth antibiotikëve, është se nuk duhet t’i përdorim kokë më vete, por vetëm nëse na thotë mjeku. Përpos të tjerash, përdorimi i tepërt i antibiotikëve dëmton veshkat, mëlçinë dhe bakteret e dobishme në zorrë.
shqipmedia