Kur të huajt na vënë në pah bukuritë e vendit tonë

“Pas një viti e gjysmë të udhëtimit të parë me biçikletë në Shqipëri (Dhjetor 2011), vendosa të rikthehem në një kohë më shumë mikpritëse". Kështu e nis shkrimin Alessandro Micozzi, një person i pasionuar pas udhëtimit me biçikletë që mbresat i ndan edhe me të tjerët.

Micozzi tregon udhëtimin e tij për në Shqipëri me titullin: Shqipëria me biçikletë: Vlora, Qafa e Llogorasë dhe Butrinti. Ai shkruan se për të ardhur në Shqipëri është fare e lehtë, mjaftojnë 70 euro nga Brindisi. Gjithashtu ai thotë se Shqipëria është shumë e lirë, të ofron shumë luks pa kompromentuar shumë financat tuaja, që në këto ditë është një gjë shumë e kënaqshme.

Micozzi tregon se ka vizituar vendet më interesantë gjatë pesë ditëve (tre ditë pedalim dhe dy ditë vizitë në Vlorë dhe Butrint). Ku thotë se i ka përballuar me vetëm 250 për dy persona.

“Pyetja e parë që më drejtohet është: Çfarë të thonë kur ecën me biçikletë nëpër Shqipëri? A nuk është e rrezikshme? Jo nuk është”, shkruan Micozzi. Rreziku më i madh tregon ai ishte se për dy sanduiçë iu desh të paguajë 30 euro. “Shqipëria është po aq e rrezikshme sa dhe Italia”, mbyll Macozzi këtë çështje.

Fotot që sjell turisti italian janë vërtet të mrekullueshme dhe na tregojnë edhe një herë se bukuritë tona po na i zbulojnë të huajt. Kjo ndoshta pasi ne nuk jemi të vetëdijshëm për vlerat e bukurisë së vendit tonë.

/Shekulli Online/Përgatiit: F.S./