Festivali i Teatrit në Elbasan

Mbrëmjen e së dielës ka ngritur siparin edicioni i 15 i Festivalit Ndërkombëtar të Teatrit Bashkëkohor “Arkitektura e Ndjenjës”, një event i kthyer tashmë në traditë në teatrin “Skampa” të Elbasanit.

Ceremonia e hapjes u mbajt nga Drejtori i Festivalit, Adonis Filipi, i cili ngjiti në skenë presidentin e festivalit, kreun e Bashkisë Qazim Sejdini, aktoren e madhe shqiptare Tinka Kurti, regjisorin me origjinë shqiptare i cili vjen me trupën e tij nga Italia, Marsel Leska, si edhe Drejtorin e teatrit, Bashkim Paheshti.

“Kam besim që edhe vitin e ardhshëm do ta kemi këtë festival për t’i dhënë qytetit më shumë gjallëri dhe kulturë”, u shpreh kryebashkiaku i Elbasanit.

Kanë përshëndetur hapjen e këtij eventi artistik edhe aktorët që për vite me radhë e kanë ndjekur atë.

“Falenderoj kryetarin e Bashkisë së Elbasanit dhe Adonis Filipin të cilët mundohen të mbajnë gjallë këtë festival”, theksoi Margarita Xhepa.

Pas përshëndetjeve dhe urimeve të rastit, siparin e Festivalit e ka hapur trupa e Teatrit “Slavja” e Beogradit me veprën “Ariu” të A.P Chekhov dhe regji të Zijah Sokoloviç.

Në edicionin e 15 të Festivalit Ndërkombëtar të Teatrove do të marrin pjesë dhjetë trupa teatrore, tetë prej të cilave vijnë nga Europa Perëndimore.

Ndërkohë, gjatë rrugëtimit të këtij festivali janë shfaqur në Teatrin Skampa të Elbasanit 160 premiera që nga viti 1999, kur edhe ka nisur, duke ngjitur në këtë skenë rreth 2 mijë artistë.

Top Channel