Pensionet e emigrantëve, marrëveshje me Belgjikën

• Është hera e parë që nënshkruajmë një marrëveshje të tillë me një vend të Bashkimit Evropian.

Ministri i Mirëqenies Sociale dhe Rinisë, Erion Veliaj si dhe zv/kryeministrja dhe Ministrja e Çështjeve Sociale, Laurette Onkelinx, kanë nënshkruar në Bruksel marrëveshjen dypalëshe për mbrojtjen sociale.

Marrëveshja mundëson njohjen e viteve të punës për 35 000 emigrantët shqiptarë në Belgjikë.

Shqipëria ka marrëveshje me Turqinë, ndërkohë janë në proces negocimi marrëveshjet dypalëshe me Hungarinë, Rumaninë, Maqedoninë, Republikën Çeke.

"Reformimi i sistemit të mbrojtjes sociale, sigurimeve shoqërore dhe sistemit shëndetësor janë prioritet për qeverinë", - ka deklaruar ministri.

Synimi i Ministrisë së Mirëqenies Sociale, është që të nxisë raportin dypalësh me vendet fqinjë të Shqipërisë, Italinë dhe Greqinë vende ku jetojnë pjesa më e madhe e emigrantëve shqiptarë.

"Është hera e parë që nënshkruajmë një marrëveshje të tillë me një vend të Bashkimit Evropian. Kjo do të shërbejë si etalon edhe për marrëveshje të tjera", - ka thënë Veliaj.

/Shekulli Online/S.H./