Tiranë, simpatizantët e PS rrahin dy të rinjtë para votimit

TIRANE – Lajmifundit - Policia e Tiranës informoi pak çaste më parë në lidhje me një tjetër incident zgjedhor të ndodhur në Tiranë. “Sot rreth orës 17.00’ në rrugën “Irfan Tomini” në Tiranë, në oborrin e kopshtit Nr.45, në të cilën është vendosur qendra e Votimit Nr.1849, janë goditur me grushte dhe sende të forta dy shtetas të cilët, ishin afruar për të votuar”, thanë burimet e policisë.
Sipas tyre, shtetasit e dëmtuar janë Erald dhe Energis Hasaj, respektivisht të moshave 18 dhe 19 vjeç, djemtë e shtetasit Përparim Hasaj, i caktuar me detyrën e Komisionerit të Subjektit Partia Demokratike e Shqipërisë.
Në vendngjarje mbërritën shërbimet e Policisë, të Komisariatit të Policisë Nr.2 Tiranë, të cilët kanë siguruar deklarimet e të dëmtuarve dhe po punojnë për dokumentimin e mëtejshëm proçedurial dhe hetimor të kësaj ngjarje, në bashkëpunim me Prokurorinë e Rrethit Gjyqësor Tiranë.
Nga hetimet e menjëhershme në vendngjarje, dyshohet se autor janë shtetasit Fatmir Meta, 42 vjeç dhe Viktor Agolli, 43 vjeç, të cilët ndërkohë janë shpallur në kërkim. Të dy autorët e ngjarjes njihen si mbështetës të Partisë Socialiste.