Trajneri Josip Kuzhe përsërit: Nuk iki nga Kombëtarja e Shqipërisë

Trajneri i Kombëtares së Shqipërisë, Josip Kuze ka përsëritur edhe një herë se nuk e ka ndërmend t’i braktisë kuqezinjtë për ta marrë postin e trajnerit të Dinamos së Zagrebit.

Strategu kroat ka pohuar se nuk është kandidat për ta zëvendësuar boshnjakun Vahid Halilhodzic, i cili të shtunën u largua nga posti i trajnerit të klubit më me famë në Kroaci.

Mediat kroate tash e një kohë të gjatë kanë spekuluar se Kuze do ta zëvendësojë Halilhodzicin. Por, Kuze thotë se tani për tani është i përqendruar vetëm në Kombëtaren shqiptare.

“Mendoj vetëm për përgatitjet e Shqipërisë për ndeshjen e radhës eliminatore ndaj Bosnjës. Tani nuk kam ambicie për ta udhëhequr Dinamon. Thjesht, kam respekt dhe obligime ndaj Federatës Shqiptare të Futbollit (FSHF), udhëheqësit e së cilës ndaj meje kanë qenë jashtëzakonisht korrektë dhe nuk më takon t’i braktis apo t’i tradhtoj”, ka deklaruar Kuze për vecernji.hr.

Ekipi kuqezi ka pasur paraqitje të mira në eliminatoret për Euro 2012 dhe ende i kanë gjallë shpresat për kualifikim në Kampionatin Evropian.