BB: Rritja ekonomike e Shqipërisë, pozitive

Korçë, 8 nëntor 2011, NOA - Drejtoresha e Bankës Botërore për Shqipërinë, Kseniya Lvovsy, ka deklaruar nga qyteti i Korçës se Shqipëria ka shënuar rritje të larta ekonomike.
Gjatë një ore leksioni me studentët e fakultetit ekonomik të Universitetit të Korçës “Fan Noli”, Lvovski ka theksuar se Shqipëria ka qenë i vetmi vend në Europë, që pavarësisht krizës botërore vazhdoi të ketë rritje ekonomike edhe për vitin 2009.
“Ndërsa në shumë vende të Europës ekonomia u tkurr dhe prodhimi i përgjithshëm bruto u ul në masën 30 përqind, Shqipëria njohu sërish rritje ekonomike. Gjatë viteve 1998-2008 vendi ka reaguar me vlera pozitive sa i takon rritjes ekonomike, ndërkohë që një rritje e tillë ka vijuar edhe gjatë viteve 2009”, tha ajo.
Nga ana tjetër, drejtoresha e Bankës Botërore ka vlerësuar se Shqipëria ka shënuar sukses vitet e fundit edhe përsa i përket uljes drastike të nivelit të varfërisë, sidomos në zonat rurale, nga 25 përqind në 12 përqind.
Drejtoresha e BB për Shqipërinë tha se, sot paraqiten sfida të reja të cilat kanë të bëjnë me ndihmën sociale, e cila, sipas saj duhet të jetë e targetuar më mirë dhe të shkojë tek personat që kanë vërtet nevojë.

“Po ashtu duhet pasur në vëmendje edhe dhënia e mundësive nëpërmjet përmirësimit të sistemit arsimor, duke e cilësuar këtë të fundit si faktorin më të rëndësishëm për suksesin e ekonomisë shqiptare”, tha Lvovski.
Më tej, kreu i Bankës Botërore për vendin tonë, u ka bërë të ditur studentëve, mbështetjen e vazhdueshme të këtij institucioni me projekte për mjaft sektorë të ekonomisë shqiptare, shëndetësisë, arsimit dhe shoqërisë civile, të cilat arrijnë vlerën e 1.4 miliard dollarëve.

a.q/NOA

Po kush na le ne mo te ngreme koke....e si i behet qe jemi gjithmone ne krize sipas kesaj cudi...!

Ky lajm eshte si t'i thuash te varferit qe ke per te ngrene...
Se ne Shqiperi qe te pritet uji e drita ende kur ndodhemi ne skaje "perendimore", ky fenomen nuk eshte rritja ekonomike por rritja e hajdutit...