Në Kalanë e Rozafës gjenden varre të shekullit XVI

Prishtinë, 21 maj – Në Kalanë e Rozafës në Shkodër kanë dalë në sipërfaqe varre të hershme. Një ekspeditë shqiptaro-polake ka bërë zbulimin e varreve që i përkasin shekullit XVI. Kjo ka bërë që Kalaja e njohur e qytetit antik të Shkodrës të kthehet në vëmendje të specialistëve jo vetëm shqiptarë, por edhe të huaj.

Gërmimet arkeologjike në këtë zonë kanë filluar pas 30 vjet ndërprerjesh. Ato janë përqendruar në dy zona, atë të Tabakëve poshtë Kalasë, buzë lumit Drin dhe sipër në oborret e Kalasë së lashtë të qytetit verior.

“Aktualisht jemi akoma në punimet e periudhës së gjurmëve otomane, ndërkohë që në vazhdim do të zbresim më poshtë duke u ballafaquar me periudhat veneciane për të vijuar me ato mesjetare, antike, ilire, si dhe të tjera të periudhave të mëhershme që e kanë shoqëruar në vite këtë rajon”, ka thënë arkeologu Saimir Shpuza, në një prononcim për mediet shqiptare.

Grupi i ekspeditës shqiptaro-polake do të vijojë të qëndrojë në Shkodër deri më datën 6 qershor. Për këto gërmime arkeologjike është nënshkruar një kontratë 5-vjeçare midis Ministrisë së Kulturës së Shqipërisë, Parkut Arkeologjik të Shkodrës, Bashkisë së këtij qyteti, si dhe universitetit “Luigj Gurakuqi”. Ky projekt do të mundësohet nga Ministria e Turizmit dhe Ambasada polake në Tiranë.

Gërmimet që sapo kanë filluar mendohet se do të përfshijnë gjithë zonën përreth Kalasë Rozafa dhe zonën brenda saj.