Gjendet një statujë e Skënderbeut

Statuja u gjet sot në Qafë Kashar, e hedhur në anë të rrugës. Ajo është rreth 3 metra e lartë

Një statujë e heroit tonë kombëtar, Skënderbeut është gjetur sot në Qafë Kashar të Tiranës. Mësohet se statuja e Skënderbeut është rreth 3 metra e lartë dhe u pikas fillimisht nga disa banorë të zonës.

Policia shkoi menjëherë në vendngjarje dhe rrethoi zonën. Mësohet se kanë nisur hetimet për zbardhjen e origjinës së kësaj statuje. Po kështu, mendohet se statuja mund të jetë hequr nga ndonjë vend dhe më pas është hedhur në vendin ku u gjet.

Policia e zhvendosi statujën nga rruga dhe nuk lejoi që publiku apo gazetarët t’i afrohen asaj. Pritet që shumë shpejt policia të publikojë një deklaratë lidhur me zbulimin e statujës së Skënderbeut dhe të zbardhë detaje rreth origjinës së saj.

/Shekulli Online/E.D./

Misteri i statujës së Skënderbeut

Banori që lajmëroi policinë thotë se, statuja “u hodh nga një kampion që vinte nga Dogana Tiranë"

Njëlloj si “Kali i Trojës”, para shtëpisë së një banori tek “mbikalimi i Rinasit”, ka mbirë një statujë e Skënderbeut. Statuja nuk është e ngjashme me mijëra statuja të tjera që janë bërë për heroin tonë kombëtar.

Kjo është një shtatore gjysmënjeri dhe gjysmëkalë. Është njëlloj centaur-i (krijesë mitologjike me kokë, krahë, dhe bust njeri dhe trup dhe këmbë kali. Ndryshe nga statuja të tillë klasike ky trupi i kalit është me dy këmbë, në rastin e statujës së Skënderbeut, kali ka dy këmbë.

Sipas njoftimit të policisë kemi të bëjmë me një statujë të dëmtuar në të gjithë diametrin e saj. Por ende nuk dihet asgjë se nga e ka origjinën kjo statujë. Personi që ka lajmëruar policinë për këtë statujë të çuditshme, thotë se, ajo “u hodh nga një kampion që vinte nga Dogana Tiranë”.

/Shekulli Online/F.S./