Parada ushtarake në Greqi nën masa të rrepta sigurie

Masa të rrepta siguri janë marrë nga shteti grek për ditën e nesërme, ku pritet të zhvillohet parada ushtarake e 25 marsit, ndërsa futja në sheshin qendror të Athinës, Sintagma do të lejohet vetëm me ftesa dhe akreditime. Policia do të verë në zbatim masa të posaçme për qarkullimin rrugor.

Qytetarët do të kenë mundësinë të ndjekin paradën nga larg në anë të rrugës. Masa të ngjashme do të merren në gjithë bashkitë e Athinës, ku do të bëhen paradat e nxënësve, ndërsa gjatë dy ditëve do të ketë modifikime dhe në orarin e lëvizjes të mjeteve të transportit publik.

Parada ushtarake e 25 marsit në Greqi u bë më e njohur për publikun shqiptar pas thirrjeve antishqiptare, që u lëshuan disa vjet më parë nga forcat ushtarake të marinës, por në përgjithësi vitet e fundit ajo është karakterizuar nga incidentet e shkaktuara prej elementëve ekstremistë.



25 marsi është festa kombëtare e Greqisë, kur kujtohet fillimi i revolucionit të 1821 dhe lufta kundër turqve, që çoi në njohjen e shtetit grek në vitin 1830 nga Traktati i Londrës.

/Shekulli Online/ E.L./