Protesta në botë: “Ju jeni Charlie, unë e dua Muhamedin”

Nga Turqia në Filipine, myslimanët kanë organizuar protesta në shenjë zemërimi kundër revistës satirike “Charlie Hebdo”, e cila në kopertinën e numrit të saj të fundit publikoi një karikaturë të Profetit Muhamed.

Revista shiti brenda pak minutave tre milionë kopje në orët e para të mëngjesit të djeshëm dhe njoftoi se po botonte 5 milionë të tjera për shkak të numrit të lartë të kërkesave.

Në kopertinën e saj ishte vendosur karikatura e Profetit Muhamed me një çallme në kokë dhe me një pankartë në dorë ku shkruhej “Je suis Charlie”.

Por, për myslimanët në të gjithë botën kjo përbën një fyerje, kjo sepse besimi i tyre e ndalon rreptësisht pikturimin e imazheve të Profetit.

Në Filipine me mijëra njerëz kanë protestuar në qytete të ndryshme sa për karikaturën e Profetit Muhamed aq edhe për standardet e dyfishta të Perëndimit.

Protestuesit në Marawi kanë djegur në shenjë simbolike disa kopje të revistës “Charlie Hebdo”, ndërsa me zë të lartë fajësonin Perëndimin për vdekjen e shumë myslimanëve në botë.

Në një poster që mbahej në dorë nga protestuesit shkruhej: “Ju jeni Charlie, unë e dua Muhamedin”. Një tjetër shkruante se nuk do të ketë falje nga bota islame për masakrën e Parisit.

Protestuesit kanë djegur edhe një portet gjigant të kryeministrit izraelit, Benjamin Netanjahu dhe flamurin izraelit.

Protesta ka pasur edhe në vendet të tjera myslimane. Në Turqi mijëra persona u mblodhën në sheshin qendror të Stambollit duke protestuar kundër “Charlie Hebdo”. Ata dëgjogën edhe një kopje të një të përditshmeje turke që publikoi në katër faqe karikaturat e revistës satirike franceze.