Guardiola, e ardhmja në Milano

Pep Guardiola sezonin e ardhshëm do të jetë trajneri i një prej skuadrave të Milanos. Këtë gjë e ka bërë të ditur Carletto Mazzone, mik i ish-teknikut të Barcelonës.

“Do të kthehet në pankinë dhe do të stërvisë një nga ekipet e Milanos”, theksoi trajneri veteran italian që e ka drejtuar Guardiolën në kohët e Brescias.

Massimiliano Allegri dhe Andrea Stramaccioni janë në fije të perit tek Milan dhe Inter. Gjithashtu Berlusconi dhe Moratti janë të “dashuruar” pas Guardiolës dhe lojës që ka treguar me katalanasit. Tashmë ëndrra e tyre mund të bëhet realitet.

Për momentin kuqezinjtë duken në avantazh, por deri në verën e ardhshme shumë gjëra mund të ndryshojnë.

Sipas disa burimeve për sportmediaset.it, Guardiola do të donte si ndihmës të tij Roberto Baggion.