Provat e palëkundshme kundër Armstrong

Legjenda e çiklizmit, Lance Armstrong, ndërmori programin më të sofistikuar, profesional dhe të suksesshëm të dopingut në historinë e sportit”, pretendoi Agjensia Amerikane Anti-Doping (USADA), pasi zbuloi një seri provash të reja për fajësinë e shtatë herë fituesit të Turit të Francës ditën e mërkurë.

Në provat e publikuara që mbështesin dënimin që u dha më parë ndaj 41-vjeçarit, të cilit iu hoqën të gjithë titujt e fituar në karrierë (dënim ende i pakonfirmuar nga Agjensia Ndërkombëtare e Dopingut), përfshihen edhe dëshmitë e një pjese të çiklistëve të tjerë të skuadrës.

Me raportin që do të publikohet i plotë në orët e ardhshme, “USADA” theksoi se “provat kundër Armstrong, të cilat kalojnë 1 mijë faqe, janë të palëkundshme dhe përfshijnë dëshminë e 26 personave që kishin dijeni për marrjen e substancave të ndaluara, midis tyre edhe 15 çiklistë dhe aktorë primarë në këtë aktivitet dopingu”.