Champions, Chelsea dorëzon kurorën

Me tetë skuadrat e kualifikuara sot është plotësuar 16-shja e fazës tjetër të Champions League.

Juventus, jo vetëm që është kualifikuar përballë Shakhtar, por edhe ka arritur të fitojë me skuadrën ukrainase, duke marrë kreun e grupit E në kuotën e 12 pikëve, ndërkohë që skuadra e Lucesku-t, falë golave në fushën kundërshtare në përballjet me Chelsea, mban vendin e dytë në grup për të kaluar më tej, ndërsa kampionët në fuqi, edhe pse shkatërruan 6-1 Nordsjaelland, dorëzuan kurorën e Champions-it që në fazën e grupeve, për të luajtur në raundin tjetër në kupën Europa League.

Bayern e mbyll si kokë grupi këtë fazë, pasi ka mundur 4-1 BATE Borisov. Edhe pse në pjesën e dytë bavarezët luajtën me 10 lojtarë, pas daljes me kartonin e kuq të Boateng, shënuan plot 4 herë në portën kundërshtare, mes autorëve edhe mesfushori me origjinë shqiptare, Xherdan Shaqiri.

Fitorja e Valencia-s me Lille 0-1, i kualifikon spanjollët për më tej, por në vendin e dytë, ndërkohë që skuadra franceze mbetet në Europa League.

Kualifikimi i Barcelonës zbehet disi, jo vetëm për barazimin 0-0 në ndeshjen e fundit me Benfika-n, por sepse i është dëmtuar Lionel Messi, ylli argjentinas i cili ishte në prag të rekordit të Muller-it, duke i mjaftuar vetëm një gol.

Me këtë barazim, Benfika zbret në kupën Europa League, ndërkohë që Celtic ia del mbanë të kalojë më tej, pasi mundi Spartak Moskoë 2-1.

Dy skuadrat e tjera të kualifikuara janë Manchester United dhe Gallatasaray. Britanikët e kishin siguruar më parë dhe në ndeshjen e fundit, me humbjen përballë Cluj-it, i dhanë mundësinë këtyre të fundit të luajnë në raundin tjetër në kupën Europa League, ndërsa Braga u mund edhe në këtë ndeshje të fundit nga skuadra turke e Gallatasaray-t me rezultatin 1-2.

Çiftet e ardhshme të Champions League, por edhe të kupës Europa League, do t’i mësojmë më 20 dhjetor, kur do të hidhet edhe shorti për raundin tjetër.