Milan-Balotelli, mungon vetëm firma

Mario Balotelli është shumë pranë kalimit tek Milani. Agjenti i tij, Mino Raiola, është takuar në Londër me drejtuesit e Manchester City dhe kanë arritur marrëveshjen: 20 milionë euro plus 3 milionë euro bonus.

Sipas mediave sportive italiane, duket se anglezët e kanë pranuar ofertën e Milanit që do e paguajë këtë shifër në këste për gjashtë vitet e ardhshme. Në orët në vijim pritet zyrtarizimi.

Gjithashtu, sulmuesi italian ka pranuar të ulë rrogën e tij vetëm e vetëm që të kthehet të luajë në Itali. Do të përfitojë 4 milionë euro në sezon, ndërsa tek City paguhej 5 milionë euro.

Mendohet se Balotelli do të nënshkruajë një kontratë prej 4 vitesh e gjysmë me kuqezinjtë e Milanos.