Shqipëri-Kosovë, Berisha: Bashkë në BE. Rama: Saliu bëri biznes me “Rrugën e Kombit”

(I përditësuar)- Kryetari i Partisë Socialiste, Edi Rama ka reaguar mbi deklaratën e bërë sot nga kryeministrit Berisha, i cili akuzoi se opozita bëri përpjekje për bllokimin e realizimit të “Rrugës së Kombit”. Rama në reagimin e tij theksoi se asnjë përfaqësues i PS-së nuk ka shprehur qëndrim kundër ndërtimit të rrugës por kanë denoncuar vjedhjen që ka bërë qeveria me taksat e qytetarëve.

“E kam sfiduar dhe e ri sfidoj të provojë me një dokument të vetëm që unë apo cilido nga përfaqësuesit e PS-së të jetë shprehur kundër Rrugës së Kombit si projekt. Ndërkohë, që i ri them turp, turp që me rrugën e kombit keni bërë një biznes fitimprurës duke grabitur fondet e taksapaguesve shqiptarë”, u shpreh kreu i PS-së.

PS ka mbajtur sot mbledhjen e parë të Kryesisë së re, e cila u zgjodh nga anëtarët e Asamblesë Kombëtare. Kryetari socialist pas përfundimit të mbledhjes e konsideroi këtë forum të lartë vendimmarrës të PS.

“Zhvilluam një mbledhje konsultative të Kryesisë së re prej së cilës jam jashtëzakonisht i kënaqur. Ishte një mbledhje e cila më krijoi bindjen në zgjedhjen e bërë nga Asambleja Kombëtare dhe në disponimin e të gjithë anëtarëve dhe anëtareve të Kryesisë së re për t’u vënë në dispozicion të fitores së zgjedhjeve të ardhshme”, tha Rama.