Tiranë, dy persona plagosen me një armë, policia i arreston në spital

Wed 12 Oct 2011 - 19:29

Dy persona kanë mbetur të plagosur me të njëjtën armë mbrëmjen e djeshme në Tiranë ndërsa më pas ata kanë rënë në prangat e policisë.
Sipas burimeve zyrtare mësohet se mbrëmë rreth orës 22.00’ nga Specialistët e Seksionit Kundër Krimeve ndaj Jetës dhe Lirisë së Personit në Policinë e Kryeqytetit u krye arrestimi në flagrancë i shtetasve Ilir Ismail Nika, 27 vjeç, banues në Tiranë dhe Bari Mersin Bregu, 36 vjeç, banues në Tiranë.
Policia tha se arrestimi i tyre u krye pasi mbrëmë në rrugën “Niko Avrami” në Tiranë, pas një konflikti për motive të dobëta, kanë plagosur njëri – tjetrin me armë zjarri pistoletë TT, armë e cila ishte në posedim të shtetasit Ilir Nika dhe gjatë konfliktit janë plagosur të dy shtetasit, ndërkohë që shtetasit Bari Bregu është larguar nga vendngjarja.
Aktualisht të dy të dëmtuarit ndodhen në Spitalin Ushtarak Tiranë jashtë rrezikut për jetën ndërsa materialet në ngarkim të tyre i kaluan Prokurorisë së Rrethit Gjyqësor Tiranë, për konsumim të veprëns penale të plagosjes dhe armëmbajtjes pa leje.