Arabi Saudite, meshkujve u ndalohet shitja e të brendshmeve femërore

Arabi Saudite, 4 Janar 2012, NOA - Në Arabinë Saudite duke nisur që nga dita e nesërme do të jenë vetëm femrat ato që do të punojnë në dyqanet e të brendshmeve pikërisht për seksin e tyre.

Ligji që është miratuar në vitin 2006 dhe që tani merr zbatim, i ndalon meshkujve të punojnë në fushën e veshjeve femërore dhe në dyqanet kozmetike.

Siç raportohen për agjencinë e lajmeve NOA.al, ky ligj asnjëherë nuk ka qenë në fuqi dhe meshkujt lejoheshin të shisnin rroba të brendshme grash apo dhe pajisje kozmetike dhe bizhuteri.

Ministria e Punës dhe Cështjeve Sociale saudite ka njoftuar se më shumë se 28 mijë femra kanë prezantuar kërkesën për vende pune pikërisht në fushën e këtyre shitjeve.

Sheik Abdul-Aziz Al Sheikh, fetari më i moshuar në Arabinë Saudite, është shprehur kundër këtij rregulli në një nga deklaratat e fundit të tij, duke konfirmuar se rregulli bie në kundërshtim me parimet islamike.

r.b/NOA