Veseli: Dikush me çdo kusht do luftë gjelash në Kosovë

1 shkurt – Ish-shefi i Shërbimit Informativ të Kosovës, Kadri Veseli, nuk pajtohet se faktori politik i Kosovës në të kaluarën ka qenë i përçarë. Ai insiston se ka pasur unitet në qëllim, ndërsa fajin për, siç e quan, hendekun e krijuar mes asaj që sot njihet si krah i luftës dhe lëvizjes për rezistencë paqësore e hedh jashtë oborrit të ish-UÇK-së.

Në intervistën ekskluzive dhënë mediave të Grupit KOHA, KTV-së dhe “Kohës Ditore”, Veseli ka folur për proceset e së kaluarës në Kosovë, për luftën për çlirim nga Serbia, për mospajtimet e vazhdueshme mes faktorit politik të Kosovës, për Shërbimin e zbulimit të cilin e udhëhoqi dhe për planet e tij për përfshirje në politikë.

Pjesa e parë e intervistës është transmetuar së pari të hënën mbrëma në KTV, në kuadër të emisionit të ri politik “Pressing”.

Koha Ditore: Së pari kush është Kadri Veseli, “Shtatëshi” apo “Luli”, apo sido që ju quajnë?

Veseli: Meqenëse pyetja juaj është hipotetike, unë do të përpiqem të përgjigjem në atë se çfarë jam, në kuptim nga jeta ime personale, duke pasur parasysh, se gjykimi i qytetarëve, në fund do të jetë për secilin ai i cili është në të vërtetë. Unë jam Kadri Veseli, kam lindur në qytetin e Mitrovicës, jam fëmija i shtatë i prindërve të mi, kam jetuar në bashkësi familjare me prindërit e mi në Mitrovicë, kam mbaruar shkollën fillore dhe të mesme po në Mitrovicë, kam filluar studimet në Universitetin e Prishtinës, duke i përfunduar në Universitetin e Tiranës. Për sa i përket aktivitetit tim kam qenë, jam munduar të jap kontributin tim, atë që quhet obligim qytetar që mendoj se secili e ka pasur ndaj vendit të vet, kam qenë pjesë aktive e lëvizjes studentore, lëvizjes nacionale të kohës, në të cilën kemi vepruar duke u përfshirë më vonë edhe në Ushtrinë Çlirimtare të Kosovës si luftëtar i lirisë.

Pjesën e parë të intervistës, komplet mund ta lexoni sot në “Koha Ditore”.