Mirë se erdhe në shtëpinë tonë presidenti ynë

“Mirë se erdhe në shtëpinë tonë presidenti ynë”. Me këto fjalë lideri i Partisë Demokratike Shqiptare (PDSH) në selinë e partisë e ka pritur Presidentin e Republikës së Shqipërisë, Bamir Topi.
Tetovarët e pritën presidentin shqiptar me qilim të kuq, ndërsa ai i porositi, të jetojnë në harmoni me maqedonasit dhe të ndërtojnë mentalitet të përbashkët evropian.


“Ju bëj thirrje të vazhdoni të jetoni në paqe dhe harmoni mes vete dhe me maqedonasit në Maqedoni, me qëllim të ndërtimit të mentalitetit të përbashkët për shkak se ardhmëria jonë është në Evropën pa kufij dhe Ballkanin pa kufij. Tash është kohë tjetër edhe për ne edhe për fëmijët tanë”, deklaroi presidenti Topi në Tetovë.
Ai theksoi se historia i ka ndarë shqiptarët me kufij administrativ, por rikujtoi se zemrat e tyre rrahin për shkak se flasin gjuhën e njëjtë dhe kanë kulturë e traditë të përbashkët.