“Kepler 37-b”, pikaset planeti më i vogël jashtë sistemit diellor

Tashmë dihet sesi në astronomi, rekordet zgjasin fare pak, falë përmirësimit të vazhdueshëm të teknologjive të vëzhgimit dhe eksplorimit. Këtë herë bëhet fjalë për një rifreskim në kategorinë e planetëve jashtë sistemit diellor. Pikërisht NASA ka zbuluar një planet edhe më të vogël sesa "Kepler 10-b", që ishte vëzhguar në janar të vitit 2011 dhe mbante rekordin si planeti me përmasa më minimale. Mirëpo tani, ai është kapërcyer nga "Kepler 37-b", i cili është planeti më i vogël ekstra-diellor i zbuluar ndonjëherë. "Kepler 37-b" ka dimensione më inferiore sesa ato të Mërkurit dhe vërtitet rreth yllit "Kepler 37", shumë i ngjashëm me Diellin tonë. Sipas shkencëtarëve, "Kepler 37-b" është një planet shkëmbor, me një sipërfaqe tepër të ashpër. Për shkak të dimensioneve të tij të reduktuara, me shumë mundësi nuk ka atmosferë e ujë.
Merita e zbulimit i shkon edhe një herë anijes hapësinore Kepler, e lëshuar në vitin 2009 nga NASA për të zbuluar planetë shkëmborë të banuar përreth yjeve të ngjashëm me Diellin në "Rrugën e Qumështit" dhe të caktonin se cilat prej tyre mund të jenë të banueshme nga njeriu. Por përsa i takon kësaj, ende asgjë s'është bërë.