Watzke: Lewandowski e do Bayern Mynihin

Fri 14 Jun 2013 - 14:33

Robert Levandovski nuk do të transferohet te Reali i Madridit, sepse dëshira e tij e vetme është Bajerni i Mynihut. Më qartë se kaq nuk mund të shprehet administratori i përgjithshëm i Borusias së Dortmundit, Hans Joakim Vacke, i cili duket i dorëzuar në luftën për ta mbajtur bomberin polak edhe një sezon në “Signal Iduna Park”. Në një intervistë për mediat gjermane, numri 1 i shoqërisë mohon zërat për një ofertë prej 30 milionë Eurosh nga Reali i Madridit dhe shton se aktualisht nuk ka asnjë kontakt me shoqërinë "Los Blancos".
Sipas tij, ka pasur shumë zëra që e lidhin sulmuesin me Realin e Madridit, por ai është i qartë në qëndrimin e tij pasi dëshiron të luajë me Bajernin e Mynihut. Pak ditë më parë ishte vetë Levandovski ai që zbuloi një prapaskenë interesante të bisedimeve me klubin e tij, duke u shprehur se drejtuesit i kanë premtuar që do ta respektojnë vendimin e tij për t’u larguar.