Pa më thoni, si e doni?!

AnGeLiC shkruajti:
Nga Inida Gjata- Zhaku
Thomëni si e doni qeverinë e re?! Thomëni si e doni bregdetin?! Thomëni si e doni Policinë e Shtetit?! Pa thomëni njëherë, si e doni rrugën! Me asfalt apo me flori?! Po a s´më thoni njëherë o njerëz, taksat si i doni, të ulëta apo të larta? Si i doni ndërtimet?! Me leje apo pa leje?! Po kulturën si e doni?! Shqiptare apo evropiane?! Si e doni korrupsionin?! Me lek apo me euro… apo me dollarë?!
Hajde, thomëni… tregomëni si e doni të ardhmen se qeveria e re po vjen dhe veç po pyesin ministrat, kryeministri e të tjerë… si e doni këtë?! Si e doni atë?! Si e doni natën?! Të bardhë apo të zezë?! Po ditën si e doni të gjatë apo të shkurtër?! Shkruamëni, thomëni se qeveria e re ka rilindur një pyetje e cila me siguri do të rrisë dhe nivelin e jetesës më angazhimin tuaj sikurse edhe vlerën e lekut nëse do t’í përgjigjeni seriozisht.
Pyetja njëqindmilionëshe u ringjall, u rilind, u ripoll dhe pret përgjigje… Pa më thoni, si e doni?!
Jo për gjë, por farsa vazhdon ta tundë Shqipërinë nga loqet, leqet, këllqet, brinjët, kreu dhe tabani. Pa më thoni, si e doni bujqësinë?! Me importe apo me eksporte? Si e doni drejtësinë?! Të drejtë apo të zhdrejtë?! Arsimin si e doni?! Me pare nën dorë apo mbi katedër?! Si e doni shëndetësinë?! Të pasiguruar apo të paspecializuar?! Ju lutem dërgojuni e-maile ministrave të rinj, qeverisë së re, kabinetit të ri se të gjithë po e kërkojnë mendimin dhe këshillën tuaj. Ata kërkojnë ndihmën tuaj sepse vetë s´ditkan gjë!
Po ja o i ardhshmi kryeministër, pikësëpari duam një qeveri me vetëm një kryeministër dhe kaq. Ç’i duam ministrat, kabinetet, administratat?! Ne një kryeministër duam. Një të bukur, një të mençur kështu si ti që di të lyejë e të zbukurojë fasadat.
Duam ne të shkretët të kursesh sa më shumë. Një kryeministër i mjafton qeverisë. Ç’i duam tërë ata ministra?! Ti që ti do e bësh punën, dihet ky muhabet. Ç’na pyet?!
Thomëni, thoni ju, po ç´t’ju themi?! Se mos ju është rrujt juve naiher ça themi ne. Ne themi poshtë korrupsioni, ti thua lart Ilir Meta. Ç’të bëjmë ne tani?! Ti thua do rilindim, neve na duket sikur kemi rivdekur.
Ç’të të themi ne të mjerët oj ti qeveri e re?! Brenda ke ca burra e gra të mirë e të zotë e të bukur e që të kënaqin syrin e veshin dhe s´na e bën zemra të të themi lëri pa rrogë ata, meqë e dimë fare mirë se punën e tyre ti do ta bësh.
S’na e bën zemra as të të themi lëri pa rrogë militantët se njerëz janë dhe ata, popull i varfër si të gjithë.
Po ç’na pyet kot?! Kur s´na bën zemra të të themi gjë?! Pa më thoni, si e doni?! Na bëri për të qeshur e për të qarë kjo pyetje që çdo ditë vjen nga ndonjë “usta” i ri i kabinetit të rilindjes.
Pa më thoni, si e doni?! Si e duam?! Si e duam?! E duam të rilindur, pra, siç na e premtuat!gazetajone