Kujdesi shëndetësor, personat me librezë gjithë shërbimet falas

Krijohet fondi i sigurimit të detyrueshëm të kujdesit shëndetësor
Rreth 250 mijë persona, pritet të përfitojnë çdo muaj nga ky fondi, i cili subvencionohet edhe nga buxheti i shtetit

Ornela Manjani



-Krijohet fondi i sigurimit të detyrueshëm të kujdesit shëndetësor, i cili parashikon të mbulojë shpenzimet në spitale për çdo person që ka një librezë shëndeti. Ligji për ka hyrë në fuqi dhe përcakton jo vetëm krijimin e fondit por edhe mënyrën e shpenzimit të tij. Sipas ligjit që sapo ha hyrë në fuqi të ardhurat dhe shpenzimet kryhen sipas ligjit “Për sigurimin e detyrueshëm të kujdesit shëndetësor në Republikën e Shqipërisë” dhe legjislacionit financiar në fuqi. Fondi menaxhon veprimtarinë e tij brenda burimeve të vlefshme financiare dhe nuk hyn në borxhe. Fondi nëpërmjet organeve të tij drejtuese, ka të drejtë të hartojë dhe të nxjerrë vendime, udhëzime, urdhëresa, rregullore dhe akte të tjera administrative, në mbështetje dhe zbatim të akteve ligjore e nënligjore dhe të kompetencave që i janë dhënë. Në ligjin e ri do të jetë Këshilli Administrativ, i cili do të vendosë për vendos për zgjedhjen, emërimin apo shkarkimin e drejtorit të përgjithshëm të Fondit dhe miraton paketat e shërbimit që financohen nga skema e sigurimit të detyrueshëm shëndetësor, të hartuara nga komisioni teknik dhe i dërgon në Ministrinë e Shëndetësisë për procedim pranë Këshillit të Ministrave. Gjithashtu këshilli miraton rregullat ekonomike e financiare, procedurale, të kontrollit, strukturën e përgjithshme organizative, strukturën e brendshme dhe rregullat e personelit, si dhe rregulla të tjera të brendshme që ai i gjykon të nevojshme gjatë veprimtarisë së Fondit në zbatim të ligjit.

Pagesat

Këshilli Administrativ do të miratojë procedurat dhe kriteret për lidhjen e kontratave dhe për pagesat, duke synuar në stimulimin e aksesit ndaj shërbimeve, kostos së efektivitetit dhe rritjes së cilësisë së shërbimeve të ofruara prej dhënësve privatë dhe publikë ndaj komunitetit. Ky këshill miraton dhe publikon Regjistrin e Dhënësve të Përzgjedhur të Shërbimeve Shëndetësore dhe Miraton raportin vjetor, raportin financiar dhe bilancin vjetor të paraqitur nga drejtori i përgjithshëm. Sipas ligjit të ri këshilli miraton rregullat dhe procedurën e funksionimit të komitetit të shqyrtimit administrativ të Fondit, të propozuara nga drejtori i përgjithshëm dhe miraton propozimin e drejtorit të përgjithshëm të Fondit për anëtarësimin në organizma ndërkombëtarë në fushën e sigurimeve shëndetësore.

Përfituesit

Sigurimi i detyrueshëm shëndetësor mbulon gjithashtu kategoritë e mëposhtme të personave ekonomikisht joaktive, pagesa e kontributeve për të cilët financohet nga buxheti i shtetit ose burime të tjera të përcaktuara me ligj. Mbulohen nga kjo skemë personat që përfitojnë nga Instituti i Sigurimeve Shoqërore, personat që përfitojnë ndihmë ekonomike ose pagesën për aftësinë e kufizuar, në përputhje me legjislacionin përkatës, personat e regjistruar si të papunë-punëkërkues në Shërbimin Kombëtar të Punësimit, fëmijët nën moshën 18 vjeç, nxënësit e studentët nën moshën 25 vjeç, me kusht që të mos kenë të ardhura nga aktivitet ekonomik dhe kategori personash që përcaktohen me ligje të veçantë.

Raportet

Në ligjin e ri ka ndryshuar edhe mënyra e raportimit të të ardhurave dhe shpenzimeve në fondin e kujdesit shëndetësor. Kështu sipas ligjit të ri fondi mban dokumentacionin në përputhje me legjislacionin financiar në fuqi. Fondi përgatit raportin vjetor për financën, administrimin, kontraktimin, paketën e shërbimeve shëndetësore dhe popullsinë e mbuluar nga sigurimi i detyrueshëm shëndetësor, të cilin e paraqet në Këshillin Administrativ. Fondi i përgjigjet kërkesave specifike të informacionit për pjesën e buxhetit që financohet nga Buxheti i Shtetit, që mund të kërkojë Ministria e Financave gjatë vitit. Ndërkohë raporti vjetor i veprimtarisë së përgjithshme të Fondit, i përgatitur nga drejtori i përgjithshëm dhe i miratuar nga Këshilli Administrativ, i dërgohet Ministrisë së Financave, Ministrisë së Shëndetësisë dhe Parlamentit.

Burimet financiare

1. Të ardhurat e Fondit krijohen nga:

a) kontributet e sigurimit të detyrueshëm shëndetësor për të gjithë personat ekonomikisht aktivë me banim të përhershëm në Shqipëri;

b) kontributet e sigurimit të detyrueshëm shëndetësor prej buxhetit të shtetit për personat ekonomikisht joaktivë;

c) kontributet e sigurimit shëndetësor vullnetar; d) transfertat nga Ministria e Shëndetësisë, për subvencionimin e një pjese të pagesave të drejtpërdrejta për kategori të veçanta të individëve të përjashtuar me vendim të Këshillit të Ministrave;

e) transfertat nga Ministria e Shëndetësisë për shërbimet e kërkuara nga ajo, përtej atyre të buxhetuara ose kontraktuara nga Fondi;

f) transfertat e miratuara në Buxhetin e Shtetit për balancimin e buxhetit të Fondit ose për kompensimin e mosrealizimit të kontributeve në procesin e zbatimit të buxhetit;

g) burime të tjera, dhurime, grante nga burime kombëtare dhe ndërkombëtare. Përdorimi burimeve financiare

1. Fondi mund të përdorë mjetet e tij financiare vetëm për arsyet e mëposhtme:

a) Për financimin e paketave të shërbimeve të sigurimit të detyrueshëm shëndetësor, si më poshtë:

- vizitat, ekzaminimet dhe trajtimet mjekësore në qendrat e kujdesit shëndetësor parësor publik dhe në spitalet publike;

- vizitat, ekzaminimet dhe trajtimet mjekësore në dhënës privat të kujdesit parësor dhe spitale private në atë masë për të cilën është rënë dakord me Fondin;

-barnat, produktet dhe trajtimet mjekësore nga dhënës të kontraktuar shërbimesh shëndetësore;

- për financimin e kërkesave nga institucionet e huaja në përmbushje të marrëveshjeve ndërshtetërore në fushën e sigurimeve shëndetësore dhe të mbrojtjes sociale të ratifikuara nga Kuvendi i Shqipërisë;

b) për shpenzimet administrative;

c) alokime në Fondin rezervë;

d) për investimet;