“Shqipëria refuzon planin serb për ndarjen e Kosovës”

Tirana ka hedhur poshtë idenë e Beogradit për ndarjen e Kosovës, shkruan sot shtypi i Prishtinës. Me kryetitullin në ballinë “Përgjigjet Tirana”, gazeta Express përkujton se zyrtarë të lartë në Qeverinë e Serbisë duke folur për mundësinë e ndarjes së Kosovës, kanë përfshirë në debat edhe shtetin shqiptar. Gazeta prishtinase shkruan te dielen se Ministri i Jashtëm i Shqipërisë, Edmond Haxhinasto, ka ripërsëritur se qëndrimi i shqiptarëve është i qartë dhe se e mbështesin plotësisht integritetin territorial të Kosovës. “Republika e Shqipërisë qëndron fort për integritetin territorial të Kosovës dhe atë e mbështet fuqishëm për njohje të reja të pavarësisë së saj”, ka thënë Haxhinasto, në një prononcim për Express. Sipas vlerësimeve të Ministrit shqiptar, ideja e krijimit të shteteve etnikisht të pastra nuk funksion në territorin e Bashkimit Europian, ku synojnë të integrohen edhe vendet e Ballkanit. “Ndarja e territoreve dhe shkëmbimeve të territoreve është një filozofi krejtësisht arkaike dhe e dështuar”, ka vlerësuar kryediplomati shqiptar.