Durrës, pushuesi 46-vjeçar mbytet në plazhin e Gjirit të Lalzit

DURRES – Lajmifundit - UPDATE – Një tjetër shtetas është mbytur sot në plazh por kësaj radhe ngjarja ka ndodhur në zonën e Gjirit të Lalzit në Durrës.
Shtetasi Hysen Korriku, 46 vjeç, nga Preza e Tiranës, mësohet se ka humbur jetën pasi është kredhur në ujin e detit Adriatik në plazhin e Gjirit të Lalzit.
Viktima mësohet se ka qenë duke pushuar në plazh me fëmijët e tij ndërkohë që është ngritur dhe ka hyrë në det rreth mesditës.
Kanë qenë familjarët e 46-vjeçarit ata që kanë dhënë alarmin për faktin se shtetasi Hysen Korriku po vononte të dilte nga uji.
Sipas policisë, viktima kishte ecur disa metra në këmbë dhe kishte hyrë në thellësi të detit por më pas nuk ka arritur të kthehet sërish në cektinë duke gjetur kështu vdekjen.
Hysen Korriku është viktima e katërt që mbytet në det në këtë sezon turistik të plazhit në Durrës.