Porno në vend të peisazheve

Aty ku duhej të kishte peisazhe të mrekullueshme, ndodheshin foto femrash krejtësisht nudo. Ajo që duhej të ishte një leksion për të rinjtë se si të mësonin vizatimin, i mësonte diçka krejt tjetër.
Blerësit e revistës ‘Dessiner’ gjetën në numrin 16 faqe me imazhe pornografike.

“Në fillim mendova se ishte një shaka. E bleva revistën në mënyrë që vajzat e mia (10 dhe 16 vjeç) të shtynin kohën në avion”, shprehet një grua për mediat zvicerane.

Kur mori në telefon shitësin për t’i kërkuar shpjegime, kuptoi se ky “gabim” ishte në të gjitha kopjet e tjera.

Revista ‘Dessiner’, që del një herë në tre muaj, shpërndahet në Belgjikë, Zvicër dhe Francë. Numri i verës është tërhequr nga kioskat edhe pse botuesit theksojnë se fotot “e nxehta” janë vetëm në 30 ekzemplarë nga 20.000 të tirazhit.