Topi jep titullin: Aktori Reshat Arbana, Nderi i Kombit

Aktori i mirënjohur shqiptar Reshat Arbana, është nderuar me çmimin nderi i kombit nga Presidenti i Republikës, Bamir Topi.
Në një ceremoni të veçantë të organizuar me figura të njohura të Tiranës, intelektualë dhe artdashës, familjarë dhe miq, pas ekzekutimit të himnit kombëtar dhe leximit të dekretit të dekorimit Kryetari i Shtetit i dorëzoi zotit Arbana urdhrin e lartë dhe dekretin përkatës në shenjë vlerësimi “Urdhrin “Nderi i Kombit” me motivacionin: “Aktorit të shquar të teatrit dhe kinematografisë, i cili me interpretimin mjeshtëror dhe origjinalitetin e tij u bë një artist popullor e shumë i dashur për publikun, rolet e të cilit kanë pasuruar me vlera të reja kulturën kombëtare.”

Presidenti Topi, në çastin kur po i dorëzonte aktorit të shquar Urdhrin e lartë në shenjë nderimi dhe respekti për ato role që i ka dhënë artit shqiptar theksoi se: “duke parë një vepër që ka mbetur në memorien e kombit dhe duke pasur parasysh faktin që juve ju duan njerëzit në Shqipëri, shqiptarët në Kosovë e Maqedoni, në Mal të Zi e në diasporë., kudo. Keni interpretuar dhjetëra filma, keni interpretuar vepra të Fishtës, të Ali Asllanit, por edhe të njerëzve të thjeshtë. Sinqerisht asnjëherë nuk ju kam parë më të emocionuar se sa sonte. Juve ju duan, sepse kanë arsye t’ju duan, sepse ju jeni një aktor i madh dhe sepse keni mbetur shumë i thjeshtë dhe jeni një njeri fisnik. Ju jeni pjesë e tyre dhe kam një detyrim institucional, por edhe nëse do të kisha qenë pjesë e thjeshtë e shoqërisë, do të isha bërë pjesë e propozimit për t’ju dhënë këtë titull.”

Duke e falenderuar Presidentin Topi për nderimin e lartë që iu bë, zoti Reshat Arbana u shpreh se ndihet shumë i gëzuar, shumë i emocionuar dhe tepër i respektuar.