“Falja e gjakut” fiton në Chicago

Filmi shqiptar “Falja e Gjakut” fiton një tjetër çmim të rëndësishëm ndërkombëtar. Joshua Marston dhe Andamion Murataj kanë fituar për skenarin më të mirë në Festivalin Ndërkombëtar të Filmit në Chicago. Ky është një prej festivaleve me të rëndësishme dhe më i gjati festival konkurrues në Amerikë. Në festival u paraqiten 150 filma nga 50 vende.
“Jemi të lumtur për çmimin e skenarit. Shkruarja e skenarit në shumë mënyra ishte pjesa më intensive dhe shpërblyese e bërjes së ‘Falja e Gjakut’. Murataj dhe unë e kemi kaluar një muaj duke udhëtuar në veri të Shqipërisë duke folur me familje që rrijnë në arrest shtëpiak për shkak të problemeve me gjakmarrjen”, ka thënë Martson.
I lumtur është shprehur edhe skenaristi shqiptar, Andamion Murataj.
“Jemi të nderuar të pranojmë këtë çmim për skenarin. Ka qenë rrugë e gjatë për të arritur deri këtu. Sot filmi shqiptar po kalon fazën e integrimeve të thella dhe filmat më shumë se kurrë realizohen si
bashkëpunime me kineastë që vijnë nga kultura të ndryshme dhe ky vërtetë megjithëse gjuhët që flasim janë të ndryshme emocionet mbeten të njëjtat.”, ka thënë Murataj.