Gordon: SHBA mbështet njohjet, vendi i Kosovës në BE

Ndihmës zv.sekretari amerikan i shtetit Philip Gordon në raportimin e tij para Dhomës së përfaqësuesve ka folur edhe për Kosovën.
“Kosova ka bërë përparim të madh në tre vitet e fundit duke fuqizuar institucionet politike dhe duke përmbushur pjesën më të madhe të detyrimeve të tij sipas Propozimit të Statusit Gjithëpërfshirës. Pasi ka kaluar një sërë testesh të qëndrueshmërisë së rendit kushtetues, Kosova duhet të vazhdojë punën fort për ndërtimin e shtetit të bashkuar dhe fuqizimin e institucioneve të saj demokratike shumë etnike. Shtetet e Bashkuara e kanë shprehur qartë se një pjesë jetike e këtij procesi përfshin sigurimin e respektit për të drejtat e gjithë komuniteteve të Kosovës – përfshirë serbët e Kosovës – dhe ruajtjen e trashëgimisë së tyre fetare e kulturore. Përparësitë urgjente të qeverisë përfshijnë zgjidhjen e papunësisë, reformën e sektorit të energjetikës, krimin e korrupsionin, pengesat ndaj biznesit dhe investimit, administratë të dobët publike dhe reformën e gjyqësorit. Si shoqëritë e tjera post-socialiste, Kosova po përpiqet të përqafojë rritjen e sektorit privat, decentralizimin e autoriteteve vendimmarrëse dhe të mësojë popullin e saj të shkëputet nga patronazhi i një qeverie të fortë qendrore”, ka theksuar Gordon.
Siç ka thënë Përfaqësuesja e Lartë e BE-së Ashton: “E ardhmja e Kosovës është në Bashkimin Europian.” Shtetet e Bashkuara inkurajojnë përpjekjet e vazhdueshme për reformë të cilat do të ndihmojnë vendin të ecë përpara drejt të ardhmes që i takon. Si vendet e tjera në rajon, të cilat janë motivuar nga perspektiva e integrimit Euro-Atlantik, besojmë se Kosova ka nevojë të shohë hapa konkretë drejt të ardhmes së saj evropiane. Në këtë kontekst, e mirëpritëm njoftimin e BE-së se do të hapë dialog mbi liberalizimin e vizave me Kosovën këtë vit.
Shpresojmë gjithashtu se Kosova së shpejti do të marrë mbështetjen e Këshillit të Europës për të përfunduar marrëdhëniet kontraktore në formën e një marrëveshjeje tregtare ose madje një Marrëveshje Stabilizim Asociimi.
Shtetet e Bashkuara mbështesin përpjekjet e Kosovës për të zënë vendin e saj në institucionet rajonale dhe globale si pjesëtare kontribuuese e bashkësisë ndërkombëtare. Tashmë 84 janë vendet që e kanë njohur Kosovën, përfshirë vendimet e fundit nga Kuvajti, Gaboni dhe Bregu i Fildishtë. Besojmë se edhe më shumë vende do ta njohin Kosovën me kalimin e kohës dhe i mbështesim fuqishëm përpjekjet e Prishtinës për të siguruar njohje më të gjerë.

//lajmifundit//