Selaniku në alarm, masa emergjente për ndotjen e ajrit

SELANIK - Qyteti i Selanikut është në gjendje alarmi për shkak të ndotjes së ajrit, që ka kaluar disa herë nivelet e lejuara dhe ka filluar zbatimi i masave emergjente në qytet.

Autoritetet thonë se këtë vit treguesit janë edhe më të lartë për shkak të shtimit të përdorimit të drurit si lëndë djegëse në shumë familje, automjeteve që djegin diesel, si dhe makinave të vjetra.

Numri i grimcave të ndotjes ka arritur nivele alarmante këto ditë edhe si pasojë e motit të thatë dhe pa erë. Raportet e parashikimit të motit thonë se problemi do të vazhdojë të paktën deri në mesditën e nesërme (e enjte).

"Nivele rekord të ndotjes janë regjistruar nga stacionet e matjes së ndotjes së ajrit të ambientit," tha kryetari i bashkisë së Selanikut Janis Boutari, duke autorizuar marrjen e masave të menjëhershme.

Trafiku i mjeteve do të kufizohet dhe nëse treguesit e ndotjes vazhdojnë të rriten, do të urdhërohet edhe mbyllja e shkollave.

Në vecanti kërkohet kufizimi i lëvizjeve të panevojshme sidomos të grupeve të rrezikuara drejt qendrës së qytetit, të sëmurëve nga zemra apo me probleme të frymëmarrjes.

Do të rriten inspektimet për të ndaluar djegiet e mbetjeve plastike dhe kaucuk në mjedise të hapura, industrive iu kërkua reduktim i prodhimeve të tyre dhe agjencive publike iu kërkua të përdorin makinat zyrtare vetëm për nevoja emergjente.

Këto masa u njoftuan pas një takimi mes autoriteteve të Selanikut dhe rajoneve përreth tij, të cilët megjithatë apelojnë se nuk ka arsye për panik.

“Nëse masat e vendosura do të zbatohen siç duhet nga të gjitha palët e interesuara, problemi do të vijë duke u zbutur dhe ndryshimi i motit të enjten do ta eliminojë dukurinë”, sigurojnë autoritetet.

Situatë e ngjashme është edhe në rajonet Kozanit, Ptolemaidhës dhe Follorinës. Balkan web