Krimi në Kallamata, vrasësi dhe viktima lanë takim në telefon

KALLAMATA - Një telefonatë në telefonin celular të 35-vjeçarit shqiptar pak kohë para vrasjes brutale të tij dhe djalit trevjeçar, në afërsi të Kallamatës, është "busulla" e policisë në hetimet për zbulimin e krimit të dyfishtë.

Tashmë, policia po mbledh informacion në lidhje me personin që e ftoi Filipin në takimin fatal, në afërsi të fshatit Plati të Kallamatës.

Sipas policisë, është e qartë se telefonuesi ishte një njeri i njohur për 35 vjecarin, pasi ky i fundit iu përgjigj menjëherë ftesës për takim dhe jo vetëm kaq, por mori me vete dhe vogëlushin, gjë që dëshmon se ai nuk ndihej i kërcënuar.

"Përse e masakruan fëmijën?" Kjo është pyetja që torturon komunitetin lokal, i cili bën thirrje të bëhet drejtësi për viktimat e krimit brutal.

Krimi i pashembullt ndodhi, të martën në mbrëmje disa kilometra larg fshatit Plati, ku prej vitesh jetonte Filipi.

Policia beson se sulmuesi ishte në makinë me Filipin dhe fëmijën dhe se pas aktit barbar e ka shtyrë mjetin në një kanal ujitjeje. Dritat e makinës, kishin mbetur ndezur, dhe kjo tërhoqi vëmendjen e një banori të fshatit, i cili njoftoi policinë.

Një nga pistat e policisë greke është vrasja për gjakmarrje, por deri tani nuk ka asnjë të dhënë nga autoritetet shqiptare të policisë, për përfshirjen e familjes së 35-vjeçarit në ndonjë aktivitetet kriminal në Shqipëri, që të mund të çonte në një veprim kaq të egër hakmarrës.

Filipi erdhi në Greqi nga Shqipëria shumë i ri, dhe në fillim merrej me punë të ndryshme sezonale, ndërsa vitin e kaluar ka punuar në ndërtim.

Familja e tij, gruaja dhe fëmijët, jetonte në Shqipëri. Një muaj më parë kishte sjellë në Greqi djalin tjetër 11-vjeçar, i cili ka probleme të rënda shëndetësore, ndaj Filipi punonte shumë për të siguruar shërimin e tij.

Çdo vit në këtë kohë vinin në Greqi edhe gruaja e tij dhe të afërmit, për të punuar në mbledhjen e ullinjve. E njëjta gjë ndodhi edhe këtë vit. Gruaja që erdhi për të punuar, mori me vete edhe djalin e vogël 3 vjecar Oligertin, i cili u gjet i therur në makinë.

35 vjeçari i pa fat, Fillim Mesaja nga Kukësi, (i njohur në Greqi si Filip Mezani) ishte i popullarizuar në Kallamata, për shkak se merrte pjesë rregullisht në garat me kuaj, me organizimin e të cilave merrej edhe vetë.

Filipi dha një impuls garave me kuaj, që zhvilloheshin në fshat dy herë në vit, duke qenë edhe vetë një kalorës shumë i mirë.