Vjen një faqe interneti për të shitur dhuratat e ish-partnerëve

Londër, 15 Shkurt 2012, NOA - Kur një lidhje përfundon, gjithmonë ekziston problemi se çfarë do të bëjmë me dhuratat e ish-partnerëve, që shumë shpesh konsistojnë në kujtime të paharrueshme.

Veçanërisht diçka e tillë ndodh kur këto objekte kanë një vlerë disi të lartë dhe nuk mundemi që thjesht ti hedhim.

Prej pak javësh, pikërisht në lidhje me këtë çështje, ka ardhur një zgjidhje e këndshme.

Është hapur një sit në ueb ku të gjithë mund të fitojnë “lirinë” nga dhuratat e ish-partnerëve.

Ideja ka qenë e një nju jorkezi Annabel Acton, që pasi u nda nga i fejuari pak ditë para Krishtlindjeve e gjeti veten në një situatë të tillë.

“Duhet të vazhdojmë para me jetën tonë dhe jo të shohim gjëra që i përkasin të kaluarës”, - pohon ajo.

Në këtë mënyrë krijoi neverlikeditanyway.com.

Siti menjëherë ka pasur një sukses të vërtetë dhe ndër objektet e shitura më së shumti ndodhet bizhuteri (varëse dhe unaza), por mund të gjenden dhe veshje të shumta që nga bluzat e deri tek pantallonat që mund të blihen nga të gjithë dhe për më tepër ato janë cilësore sepse kanë qenë dhurata në kohët e arta të dashurive tashmë të thyera.

r.b/NOA