Topalli, Bode dhe Beja kandidatë të PDSH-së për president

Ministri i Transporteve, Sokol Olldashi, deklaroi se presidenti i Republikës do të jetë një kandidat nga maxhoranca. I ftuar në emisionin “Top Story” në “Top Channel”, Olldashi tha se PS duhet të japë konsensus për kandidatin që duhet të propozojë maxhoranca. “Presidenti do të dalë nga maxhoranca. Nuk është vendosur akoma, por do të jetë me një opinion politik të shëndoshë nga maxhoranca. Ka një konsensus politik të 2008-s që është në fuqi dhe është formësuar në nenet kushtetuese të vendit. Klasa politike duhet të respektojë ligjin, ne jemi të obliguar të respektojmë ligjin. Kushtetuta e vendit e ka të përcaktuar se si zgjidhet Presidenti. Presidenti i përket maxhorancës, se mori votën popullore në 2009 dhe u rikonfirmua në 2011”. I pyetur nëse tre anëtarët e Kryesisë së PD, Jozefina Topalli, Ridvan Bode dhe Fatos Beja, mund të jenë kandidatë potencialë për presidentë, Olldashi vlerësoi të tre kandidaturat, duke veçuar ministrin Bode, si ministrin më të suksesshëm të kësaj qeverie.