BDI e RDK votuan pro, PDSH mungoi

Njëqind vjetori i flamurit kombëtar shqiptar do të shënohet me para shtetërore dhe në mënyrë institucionale. Për këtë sot vendosi Parlamenti i Maqedonisë me çka u votua propozim-programi për shënimin e përvjetorëve dhe personaliteteve të shquara në vitin 2012.

Për propozim programën votuan deputetët e shumicës parlamentare VMRO-DPMNE dhe BDI ndërsa këtë e mbështetën edhe dy deputetët e RDK-së. Kundër siç edhe pritej votuan deputetët e opozitës maqedonase të udhëhequr nga LSDM-ja.

Ndërsa deputetët e Partisë Demokratike Shqiptare (PDSH) nuk ishin të pranishëm në sallën e Parlamentit.

“Pos 100 vjetorit të flamurit kombëtar në këtë program janë përfshirë edhe data tjera të rëndësishme për historinë dhe kulturën e shqiptarëve siç është 100 vjetori i themelimit të 100 vjetorit të bandës muzikore Zani i Maleve, 100 vjetori i themelimit të shkollës së parë private shqipe në Tearcë, 100 vjetori i marrëveshjes turko-osmane e cila ka të bëjë me lufërat pas luftërave ballkanike, Revista Jehona, shënimi i 80 vjetorit të poetit tanimë të njohur Omer Kaleshi dhe ngjarje të tjera shumë të rëndësishme që kanë të bëjnë me historinë dhe kulturën e shqiptarëve”, deklaroi deputeti i BDI-së Arben Labënishti.

Sipas tij, festa më e rëndësishme e shqiptarëve është 100 vjetori i flamurit kombëtar.

“Ne si RDK lidhur me programin për shënimin e përvjetorëve shprehim keqardhje të thellë për shkak se Parlamenti nuk e pranoi 15 vjetorin nga ngjarjet tragjike të Gostivarit të vitit 1997, ngjarje në të cilën u ngrit flamuri kombëtar shqiptar dhe populli i Gostivarit bashkë me kryetarin Rufi Osmani mbrojtën flamurin. Por gjithashtu shprehim falënderim se u pranua shënimi i 80 vjetorit të lindjes së piktorit me famë botërore Omer Kaleshi”, theksoi deputeti i RDK-së, Izet Zeqiri.

(Më tepër lexoni në Zhurnal plus)