U gjet trupi i pajetë i Lorikut pesëvjeçar

Sun 4 Mar 2012 - 13:43

Në një komunikatë të Ministrisë së Forcës së Sigurisë së Kosovës, bëhet e ditur se në ora 11:05 u është gjetur trupi i pajetë i Lorik Ilir Bytyqit.
Trupi u gjet në lum nga Njësia e Kërkim-Shpëtimit të FSK-së, një kilometër larg vendit të incidentit.

Loriku pesëvjeçar ishte zhdukur afër lumit të fshatit Dobrajë e Madhe, të komunës së Lipjanit.

Personi i fundit që ka pasur kontakt me të, ka qenë gjyshi i tij. Ai ka thënë se nipi është rrëmbyer nga lumi, niveli i të cilit ishte rritur pas shkrirjes së borës.

Trupi i tij i pajetë është dërguar për obduksion në Institutin e Mjekësisë Ligjore në Prishtinë.

Ndryshe, nga shkrirja e borës uji ka vërshuar edhe disa shtëpi të fshatit Komaran të komunës së Drenasit. Për largimin e ujit që rrezikonte të përmbys shtëpitë, kishte intervenuar edhe njësiti i zjarrfikësve me pompat për thithjen e ujit.

Edhe në lagjen “Emshir” të Prishtinës, nga shkrirja e borës uji rrezikon të vërshojë shtëpitë e kësaj lagjeje.

Drejtori i Institutit Hidrometeorologjik të Kosovës, Sylë Tahirsylaj, kishte paralajmëruar se nga shkrirja e borës mund të ketë vërshime, por jo përmbytje përmasash të mëdha.

“Një pjesë të borës e pranon toka, një pjesë tjetër zbrazet në liqenet akumuluese, e pjesa tjetër në lumenjtë që janë rrekej”, ka thënë Tahirsylaj.

Ndërkaq, në kohën kur Kosova ballafaqohej me të reshura të mëdha bore, ministri i Ambientit, Dardan Gashi, ka thënë se i kanë ekspertët në terren për ta monitoruar situatën dhe se kryetarët e komunave do njoftohen për vendin ku mendohet se do të ketë rrezik.

“Ne në njërën anë jemi të kujdesshëm të mos i shqetësojmë qytetarët pa nevojë me lajme të panikut, që mund të përhapen, por në anën tjetër jemi vigjilentë që të njoftohen kryetarët e komunave dhe shtabet emergjente në kohë, se ku mund të ketë potenciale të rrezikut”, ka deklaruar më 18 shkurt, ministri Gashi. /Telegrafi/