Bild nuk do të publikojë nudo në faqen e parë

Gazeta më e madhe në Gjermani dhe Europë, Bild, nuk do ketë më femra të zhveshura në faqen e parë, pasi ditën e 8 Marsit redaksia ka vendosur që të heqë “vajzën e zhveshur të faqes 1”.
Mbi 5.000 femra janë zhveshur që nga viti 1984 për të pozuar për gazetën me një tirazh të përbindshëm, por në Ditën e Gruas, redaksia ka reflektuar. Dhe vendimin e kanë marrë vetëm meshkujt e redaksisë pasi 300 femrat kolege ishin pushim- raporton Kosovapress.

Ndryshe, në vitin 1970 ishte gazeta britanike “The Sun” që nisi të nxirrte në faqen 3 femrat e zhveshura. Ato njiheshin si “Page 3 Girls”. Gazeta nxori nudo emra të tillë si Samantha Fox apo Katie Price. Madje pati një debat në parlament kur nisën të publikohen të tilla foto. Por gjermanët e “Bild” shkuan më tej, e nxorën vajzën nudo në faqen e parë.

Tani gjërat kanë ndryshuar, por Bild premton se do t’i përmbahet si gjithmonë motos së vet: “Të vërtetat e zhveshura, ne i tregojmë të dyja”. /Telegrafi/