Roboti arriti rekord të ri në shpejtësi (Video)

Roboti katërkëmbësh, Cheetah, ka arritur rekord të ri në shpejtësi në tokë për robotët, duke lëvizur 29 kilometra në orë, në një laborator në Shtetet e Bashkuara.
Ky robot po zhvillohet në firmën Boston Dynamics në Massachusetts dhe financohet nga ushtria amerikane.

Kompania ka kumtuar të martën se roboti arriti rezultat më të mirë se rekordi i mëparshëm, që ishte vënë në vitin 1989 nga një robot me dy këmbë në Institutin e Teknologjisë në Massachusetts, me shpejtësi 21 kilometra në orë.

Sipas Evropës së Lirë, roboti katërkëmbësh mund të lëvizë më shpejt se sa ritmi mesatar njerëzor i vrapimit, por ende është larg krahasimit me fituesin e medaljes së artë olimpike, Usain Bolt nga Xhamajka, i cili për një orë i kalon afërsisht 45 kilometra. /Telegrafi/