Presidentët eksperimentalë shqiptarë

Eni Bitraku

A kanë qenë presidentët tanë eksperimentalë? A janë eksperimentuar 4 provëza? Provëza krejtësisht të krahasueshme dhe “gërshërë-prerëse”. Në të gjitha rastet asnjë qëndrim unik dhe i përbashkët. Pozicioni i tyre kushtetues sikur do mbronin para gjithë botës “doktoraturën në OKB”. Në historinë tonë pluraliste kemi katër shembuj se si janë zgjedhur presidentët; Berisha nga mazhoranca, Mejdani nuk e di as vetë si erdhi dhe iku, Moisiu konsensual dhe Bamir Topi me shumicën e Kuvendit.

Eksperimenti i radhës është ‘Presidenti sipas Kushtetutës’. Kësaj epruvete thjeshtë po i mbushin pigmente të ndryshme në formë kriteresh. Fjala bie, kërkohen kandidatë nga shoqëria civile, me duar të pastra, përfaqësues dhe në proces konsultimi gjithëpërfshirës. Mundësisht edhe femër për të thyer tabunë apo shkrimtar me emër. Palët politike në këtë rast duhet të marrin parasysh se epruveta që duan të mbushin është e tëra bosh dhe nuk ka material biologjik mbi të cilin mund të eksperimentohet.

Të gjitha këto standarde të huazuara keq, duhet të zëvendësohen me një standard shqiptar. Figura e lartë e shtetit përfaqëson shqiptarët dhe jo laboratorin e politikës. Presidenti duhet zgjedhur drejtëpërdrejtë nga populli dhe ky është standardi shqiptar.