Nju Jork, hapet bari i ujit

Në Nju Jork është hapur bari i parë që shërben vetëm ujë për klientët dhe bëhet fjalë për ujë rubineti, i cili shitet 1 dollar gota.

Bashkëpronari Adam Ruhf i tregoi agjencisë “Reuters” mbi biznesin e çuditshëm dhe i dha shpjegime edhe për justifikimin që i bëhet shitjes së ujit të çezmës.

“Trupi i njeriut përbëhet nga 60-70% ujë. Është jashtëzakonisht e rëndësishme që njerëzit të pijnë ujë çdo ditë dhe patjetër që ai duhet të jetë sa më i pastër. Tek ne, kjo realizohet përmes një proçesi të sofistikuar purifikimi. Uji i nënshtrohet një filtrimi 7-fazësh, trajtimesh magnetike, katatilike, e të tjera si këto, që e bëjnë 100% të sigurtë”, tregoi Ruhf.

Për ata që kërkojnë shëndet akoma më të mirë ofrohet ujë i pasuruar me vitamina, minerale dhe elektrolite. Ai inkurajon një përzierje suplementesh për të krijuar një tonik. Sigurisht, kjo vjen me çmim ekstra.

“Mund t’i shtosh ujit ekulibrat e PH-it, elektrolitë, çdo element natyror që i bën mirë shëndetit. Mund të bëhet. Në bar uji shitet me shishe plastike e qelqi, megjithatë klientët inkurajohen të sjellin edhe enët e veta, nëse do te duan”, tha më tej Ruhf.

Një gotë ujë është 1 dollar, një gallon apo 3,8 litra dhe kushton 3 dollarë dhe për 19 litra ujë duhet të japësh 10 dollarë. Klientët që e provuan ujin thonë se u pëlqen. “Është shumë i mirë, i pastër dhe ka një shije të këndshme”, shprehet njëri prej tyre.

Në Shtetet e Bashkuara industria e ujit të ambalazhuar është mjaft fitimprurëse e deri në 2015-ën, sipas ekspertëve, përfitimet e saj mund të mbërrijnë në 125 miliardë dollarë.