Gjysmë shekulli pa Marylin Monroe

E famshmja Marylin Monroe, emrin e vërtetë të saj e kishte Norma Xhejn Bejker. Ajo ishte aktore, këngëtare dhe modele amerikane. Lindi më 1 qershor 1926, në Los Anxheles dhe vdiq më 5 gusht 1962 po në Los Anxheles.

Ajo u rrit në një familje birësuese, pasi e ëma nuk ishte në gjendje të kujdesej për të, por ajo e vizitonte atë. Kështu pas pak kohësh, Marylin shkon të jetojë me të ëmën. Megjithatë, pak më vonë nëna e saj sëmuret dhe e shtrojnë në spital dhe për Marylin do të kujdesej shoqja e ngushtë e të ëmës, Greis McKi.

Monroe filloi karrierën e saj më parë si modele, që do të çonte në kontratën e parë të filmit më 1946, natyrisht me role të vegjël. Më pas do të vijnë role të rëndësishme si te “Asfalti xhungël” dhe “Gjithçka për Evën”, 1950. Studioi në Studion e Aktorëve dhe krijoi Marylin Monroe Production. Për rolin në filmin “Some like it hot” (Disa e pëlqejnë të nxehtë) fitoi Globin e Artë.

Vitet e fundit të jetës së saj u karakterizuan nga sëmundjet, problemet personale. Është martuar disa herë, me: Xheims Doherti (1942-1946), Xho DiMaxhio (1954- 9 muaj më pas), Artur Miler (1956- 1961). Rrethanat e vdekjes së saj, nga një mbidozë ilaçesh kundra stresit, që merrte, kanë çuar në hamendje të ndryshme, edhe pse zyrtarisht u quajt vetëvrasje. /alb-observer.com/