PS: Berisha ka nxjerrë kombin në shitje, për të mbushur arkën e shtetit

Luan_Valikardi shkruajti:Tiranë, 30 gusht 2012, NOA- Partia Socialiste deklaron se kryeministri në 100 vjetorin e Pavarësisë ka nxjerrë Shqipërinë në shitje për të mbushur arkën e boshatisur të shtetit.

Në një deklaratë për shtyp, deputetja e selisë rozë, Mimi Kodheli përsëriti zotimin e Partisë Socialiste se do të rishikojë të gjitha privatizimet e kryera nga qeveria Berisha, raporton noa.al.

“Sot që flasim pasuritë e shqiptarëve janë duke shteruar si pasojë e abuzimeve e korrupsionit, ekonomia shqiptare është e zhytur në borxhe deri në grykë, ndërkohë që për të mbushur gropën e zezë të financave të shtetit Berisha praktikisht e ka nxjerrë Shqipërinë në shitje. Në 100 vjetorin e pavarësisë të Shqipërisë, Sali Berisha ka nxjerrë kombin në shitje. Pasi fali plot qindra km katror të hapësirës ujore, në kundërshtim me Gjykatën Kushtetuese, sot Sali Berisha parashikon të shesë plot 95 për qind të pronës publike, ku midis të tjerash përfshihen 1.2 milion metër katror toka në pronësi të Ministrisë së Mbrojtjes dhe mbi 500 objekte e asete të tjera, gjithmonë publike”, u shpreh ajo.

Gjithashtu deputetja e Partisë Socialiste, denoncoi skandalin e shpenzimeve të Bankës Qendrore të Shqipërisë dhe Guvernatorit Ardian Fullani ku theksoi se në një kohë kur Banka Botërore deklaron se shumica e shqiptarëve jetojnë me më pak se 5 dollarë në ditë, guvernatorit i duket gjëja më normale që të shpenzojë miliarda lekë për mobilimin e zyrës, për udhëtime të pafundme jashtë shtetit, etj.

Sipas Kodhelit asgjë nuk tregon më qartë se këto shifra, se çfarë përmasash ka marrë tallja që po i bën Berisha dhe pushteti i tij këtij populli.

b.gj/noa.al